Terwyl die Netbal-wêreldbeker in Suid-Afrika se eie agterplaas gespeel is, het ’n plaaslike netbalspeler van Stellenbosch haarself voorberei om later hierdie week aan die Wêreld-binnenshuise netbalvereniging (WINA) se Aksie Netbal Drie-reeks-wêreldbeker in Brisbane, Australië deel te neem.
Anja Liebenberg is onlangs gekies om die Suid-Afrikaanse Aksie Netbalspan te verteenwoordig en sê dat sy dankbaar is vir die geleentheid.
“Dit is ’n seën om hierdie geleentheid te hê. Ek is regtig dankbaar vir al die ondersteuning wat ek ontvang het om die nodige fondse in te samel. Ek is superopgewonde en wil almal wat my ondersteun trots maak,” sê sy.
Liebenberg sê dat die SA-proewe vroeër vanjaar tydens die 2023 Interprovinsiale Toernooi in Gauteng gehou is, en sy het goed gevoel oor haar vertoning.
“Ek het gehoop om deel van die span te wees, maar jy weet nooit totdat jou naam genoem word nie. Ek was bly dat al my harde werk en toewyding vrugte afgewerp het. Dit was ’n langtermyn-doelwit om my land in netbal te verteenwoordig en ek is trots om deel van die span te wees en sal my alles gee.”
Dit sal Liebenberg se eerste besoek aan Australië wees en haar eerste keer dat sy teen internasionale spanne speel.
“Ek sien uit na wat ook al hierdie reis inhou en beoog om in elke oomblik teenwoordig te wees. Ek hoop ons kan ’n dubbele goud huis toe bring, maar ongeag die uitkoms hoop ek om waardevolle ervaring op te doen en as ’n speler te groei.”
Wanneer sy haar voorbereidings vir die toernooi beskryf, sê Liebenberg, “netbal, netbal, en nog meer netbal. Behalwe vir aksie netbal-spanoefening, het elke speler aan haar fiksheid en krag gewerk, wat albei belangrik is vir jou om jou beste te speel.
“Toewyding is belangrik, en jy moet tyd belê om fiks te bly en jou vaardighede te verbeter. Dit verg dissipline – veral wanneer jy moet balanseer tussen werk, aksie netbal, netbal en ’n bietjie rustyd. Emosioneel kan dit moeilik raak, aangesien dit baie op-en-af is. Jy moet altyd positief bly en in jouself glo.
“Ek is lief vir die spel omdat jy verskillende mense van oraloor die wêreld ontmoet wat deur netbal bymekaar kom. Ek het regtig goeie spanmaats en afrigters ontmoet wat elk iets spesiaal aan die span bring en van wie ek soveel geleer het,” voeg sy by.
Haar netballoopbaan het op ’n baie jong ouderdom op laerskool begin.
“Ek speel al netbal sedert ek in Laerskool Stellenbosch en Hoërskool Stellenbosch was. Afrigters en spanmaats het my meer geïnspireer as enige spesifieke rolmodel. Ek speel tans by die Van der Stel-netbalklub en was die afgelope twee jaar deel van die Tornados-span wat aan die Telkom Netbal-liga deelgeneem het. Daar is baie talentvolle spelers wat my inspireer.”
As sy na die toekoms kyk, sê sy dat sy graag eendag weer Suid-Afrika in aksie netbal wil verteenwoordig en hoop om weer in die Telkom Netbal-liga te speel.
“Dit beteken dat ek hard sal moet bly werk om my vaardighede te ontwikkel, aangesien die kompetisie taai is.”
