Die Hoër Meisieskool Bloemhof se atlete pluk reeds die vrugte van harde werk en volgehoue deursettingsvermoë.
Die Bloemhof-span is by die onlangse NWU Top-30-atletiekbyeenkoms, waar 71 skole van reg oor Suid-Afrika deelgeneem het, as die wenner van die meisiesafdeling vir skole wat minder as 15 atlete ingeskryf het, aangewys.
Slegs die top-10-Bloemhofatlete was deel van die span wat saam met die sowat 2 300 leerders aan dié byeenkoms deelgeneem het.
Mieke Basson (graad 11), Bloemhof se atletiekkaptein, het twee eerste plekke behaal – in die 100m-hekkies en in die verspring, waar sy ’n afstand van 5.58 m gespring het.
Georgia Channon (graad 11), die span se onderkaptein, het ’n eerste plek in die diskus vir meisies o.17 behaal. Haar wenafstand was 40.48 m.
