Die Belhar-rugbyklub is oorgehaal om Saterdag (18 Mei) teen Van der Stel-Evergreens (VDE) sy nederlaag van 38-35 teen UWK op laasgenoemde se tuisveld in Superliga B (SLB) te wreek en ook vir VDE van sy onoorwonne status te beroof.
Albei het vier wedstryde gespeel, waarvan Belhar twee gewen, een verloor en een gelykop gespeel het, terwyl VDE ná vier wedstryde nog onoorwonne is.
VDE het met Vineyards in Paarl met 31-20 afgereken en het 18 punte op die punteleer, en Belhar 13 punte.
Franschhoek het ook vier wedstryde gespeel en net twee gewen en het 12 punte op die punteleer. Franschhoek het Hamediehs van Athlone op sy tuisveld met 37-34 geklop en reis Saterdag na Kraaifontein vir hul kragmeting.
Kylemore het reeds vyf wedstryde gespeel, een gewen en vier verloor, en pak Strand Saterdag op eersgenoemde se tuisveld. Strand is op soek na sy eerste oorwinning om ligapunte op die punteleer aan te teken. Kylemore het die naweek met 26-19 teen Bellville in Bellville-Suid vasgeval.
In Superliga C het Pniël Villagers vir Strand United met 15-13 huis toe gestuur en reis die komende naweek na Noordhoek vir sy kragmeting teen Masiphumelele. Villagers is tans tweede op die punteleer met 18 punte, een minder as Macassar ná vier wedstryde.
In die Noordelike liga gee Stellenbosch-Coronations die pas aan van die drie spanne in Stellenbosch en is tans met 18 punte tweede ná vier wedstryde. Dis dieselfde aantal punte wat Delft het, maar die punteverskil van 17 punte tussen die twee spanne laat Delft die boonste posisie beklee.
Delft reis juis Saterdag na Idasvallei vir hul kragmeting en die tuisspan sal die bordjies op die veld en op die punteleer wil verhang. Corries het die afgelope naweek die Sir Lowrians-rugbyklub in Sir Lowry’s Pass met 24-21 getroef.
In Paarl het Raithby Universals (RU) teen Albions met 31-20 verloor. RU pak Saterdag vir Blakes, wat nog nie vanjaar ’n wedstryd gespeel het nie en ligapunte op ’n skinkbord aan hul teenstanders gee.
Excelsior pak Windmeul United by die Windmeul Primêre Skool en het Saterdag vir Whistling Wheels met 20-13 op die Cloetesville-sportgronde geklop.
In die Suidelike liga gee Blue Stars van Klapmuts nog steeds die toon aan en staan tans op 16 punte ná vier wedstryde. Blue Stars het vier wedstryde gespeel, drie gewen en een verloor. Dié span het Saterdag vir Retreat op Allenby-rylaan ’n loesing van 50-14 gegee.
Die manne van Klapmuts het die volgende twee Saterdae loslootjies en is Saterdag 1 Junie teen Watsonia in aksie.
