Dit is min dat soveel groot name op een dag dieselfde verhoog deel maar dis wat Saterdag 29 Maart by die Oesfees gebeur!
Emo Adams, Koos Kombuis en Valiant Swart is maar net drie van ’n rits musikante wat konsertgangers gaan laat stofopskop tot sonsondergang. Die Solms-Deltawynlandgoed buite Franschhoek maak dan weer sy deure oop vir musiekliefhebbers en die gemeenskap ter viering van die einde van die oes én Suid-Afrika se musiektalent.
Tommy Hall, die hoofuitvoerende beampte van die Solms-Delta Wine Company, sê die fees wat in 2024 ná sewe jaar sy terugkeer gemaak het, bring musiek én kultuur bymekaar. “Die Oesfees is ’n wonderlike platform vir opkomende én gevestigde plaaslike kunstenaars en wanneer mense van heinde en verre onder die eikebome sit met die Groot Drakensteinberge in die agtergrond én boonop heerlike Kaapse kos en wyn geniet, word dit ’n wenresep.”
Emo Adams met sy aansteeklike energie en kenmerkende humor was ’n bekende gesig tydens die beginjare van Oesfees en sal soos broer Loukmaan en sy band verlede jaar, konsertgangers van uithaler-vermaak besorg.
Hall sê hy is ook verheug dat Koos Kombuis in die dinamiese line-up is: “Hy is soos Emo ’n gróót naam in Suid-Afrika en ek het baie respek vir sy musikale bydraes oor soveel jare.” Hall is net so opgewonde oor Valiant Swart se verskyning op vanjaar se Oesfeesverhoog: “Wie kan liedjies soos Die Mystic Boer vergeet; dis reeds in 1995 vrygestel maar steeds ikonies.”
Anton L’Amour, die gesoute kitaarspeler wat al vir meer as 30 jaar van Suid-Afrika se topmusikante begelei, gaan die verhoog deel met Swart – ‘n ou vriend en musikale kollega.
Nog ‘n nuwe stem by vanjaar se Oesfees is dié van Luna Paige. Hall sê dié sanger en liedjieskrywer van Stellenbosch wat as gaskunstenaar gaan optree is ‘n groot aanwins vir die fees. “Daar word gesê dat haar musiek met jou hart en siel praat en ons sien uit om dit eerstehands te beleef.”
Geliefde plaaslike groepe soos die Papier Family Band, Die Soetstemme en Solms-Delta se eie Optelband begelei deur die bekende Nick Turner, Schalk Joubert en Carlo Fabe, gaan net nóg meer skop aan die dag se feestelikhede verskaf.
Oom Hannes Coetzee, die lepel-in-die-mond kitaarman van die Karoo, is nog ’n bekende Oesfeesgesig wat sy terugkeer maak.
Feesgangers kan ook uitsien na die sielvolle musiek met sy sterk Afrika-aanslag van Tribal Echo se Frazer Barry. Hy tree ook soos verlede jaar as seremoniemeester op.
Die ATKV sluit opnuut aan as ’n borg waaroor Hall verheug is.
- Kaartjies kos R200 per persoon en is beskikbaar by Solmsdelta.com en Plankton.mobi. Kinders onder 12, onder die toesig van hulle ouers, kry gratis toegang. Hekke maak 10:00 oop.
