Die eerste span van Excelsior-rugby het Saterdag (9 Maart) die span van Retreat-rugbyklub met 35-7 in ’n vriendskaplike wedstryd op die Cloetesville-sportterrein oorrompel.
Die tuisspan het goed begin toe die skrumskakel Pieero Siedeman ná slegs twee minute se spel onder die pale oorgeduik het. Die heelagter Lathom Small het met die doelskop geslaag (7-0).
Nadat Excelsior vir onkantspel gestraf is, het Retreat ’n verdoelde drie langs die pale gedruk (7-7). Excelsior het daarna na vyfde rat oorgeskakel en die besoekers moes weens vinnige spel behoorlik rondstaan. Die Stellenbossers se voor- en agterspelers het die bal goed hanteer.
Die blitsige vleuel Marchuis Claasen het ’n pragtige drie gedruk nadat hy met sy dartellopies verskeie verdedigers na lug laat gryp het. Small het weer met die doelskop geslaag en die halftydtelling was 14-7.
In die kleedkamer het die Excelsior-afrigters ’n paar slim veranderings aangebring, wat sommer met die afskop dadelik vrugte afgewerp het. Die losskakelrol is oorgeneem deur die talentvolle Emile Baron en die vorige generaal, Isol Titus, het ’n pragtige drie onder die pale gedruk. Morgan Wentzel het die telling 21-7 gemaak.
Ná skitterende samespel deur die Stellenbossers het Claasen weer in die hoek gedruk en Wentzel het met die doelskop geslaag (28-7).
Dit het toe meer soos eenrigtingverkeer begin lyk toe Wentzel byna dwarsdeur die hele Retreat-span hardloop om onder die pale te druk. Hy het self die drie verdoel om die eindtelling 35-7 te maak en sy span die oorwinning te besorg.
Siedeman en Claasen is as die spelers van die wedstryd aangewys.
