Buitelandse trusts word al hoe meer gewild onder Suid-Afrikaners wat op soek is na breër beleggingsopsies om hul bates te beskerm teen politieke en ekonomiese wisselvalligheid, maar ook omdat Suid-Afrikaanse trusts deur valuta-beheerreëls beperk word.
Volgens Coreen van der Merwe by Sovereign Trust, Suid-Afrikaanse trusts mag nie in die buiteland belê nie.
Die voordele van buitelandse trusts sluit in belastingneutraliteit, groter buigsaamheid en verbeterde opvolgbeplanning, wat die doeltreffende en vertroulike verspreiding van rykdom aan begunstigdes insluit.
Dit is egter van kritieke belang om jou jurisdiksie versigtig te kies en bewus te wees van potensiële uitdagings en slaggate wanneer dit kom by die strukturering van ’n buitelandse trust.
Die eerste uitdaging wat baie truststigters (”settlors”) teëkom, is die feit dat hulle beheer oor hul trust aan onafhanklike trustees moet oorgee. In Suid-Afrika is dit moontlik om ’n skenker, ’n begunstigde én ’n trustee te wees en jy kan feitlik enigiemand as ’n trustee aanstel. Buitelandse trustees moet egter gereguleer en gelisensieer wees.
Die idee om beheer oor jou trust oor te gee aan iemand wat jy nie ken nie, kan vir baie truststigters angswekkend wees. Die enigste manier waarop jy belasting kan bespaar en ’n trust behoorlik kan stig, is deur onafhanklike beheer te skep.
Ons vertrou maklik ons geld aan banke omdat hulle gelisensieer is en professionele vrywaring bied. Dieselfde beginsel geld wanneer jy buitelandse trustees aanstel.
Nog ’n sleutelverskil om te verstaan is die rol van ’n beskermer (‘protector’), wat ’n individu of maatskappy is wat die reg het om die optrede van die trustees te veto. Byvoorbeeld, as jy besig is om te skei en jy wil jou gade as ’n begunstigde verwyder, kan die trustees haar eers amptelik verwyder sodra die beskermer instem. Dit is nie verpligtend om ’n beskermer aan te stel nie, maar hulle kan ’n kritieke rol speel nadat die stigter oorlede is.
Anders as die trustees wat onafhanklik moet wees, kan ’n beskermer ’n familievriend, prokureur of rekenmeester wees. Die enigste voorbehoud is dat hulle nie self die stigter of begunstigde mag wees nie.
Die keuse van die regte jurisdiksie is ook kritiek. Baie truststigters kyk nie verder as gewilde plekke soos Guernsey of Isle of Man nie, maar daar is talle ander jurisdiksies wat oorweeg kan word, soos Malta en Siprus. As ’n EU-jurisdiksie bied hulle ’n reeks reputasievoordele. Natuurlik is Mauritius ook baie gewild onder Suid-Afrikaners weens sy nabyheid en die feit dat dit die mees koste-effektiewe opsie is.
Dit is noodsaaklik om die regte tipe truststruktuur te kies – of dit nou ’n diskresionêre trust, spaartrust (gewoonlik gestruktureer as ’n diskresionêre trust) of ’n pensioentrust is – om die beoogde doel te dien. Spaartrusts maak gewoonlik voorsiening vir beperkte aktiwiteitsvlakke, maar trustee-fooie is laer. Pensioentrusts is daarop gemik om ’n pensioenpot vir aftrede te skep, en die trusteegelde is oor die algemeen laer as by diskresionêre trusts. Diskresionêre trusts word dikwels gebruik tot voordeel van alle familielede.
- Vir meer inligting besoek: www.sovereigngroup.com/sg-south-africa/
