Die Groot Drakenstein-polisie, twee Community in Blue-lede en ’n buurtwaglid van Groot Drakenstein het Dinsdag (10 Desember) ’n man in hegtenis geneem en op ’n groot hoeveelheid dwelms en ander gesteelde items beslag gelê. Volgens Charlene Pietersen, ’n woordvoerder van die Groot Drakenstein-polisiekantoor, het polisiebeamptes die R45 gepatrolleer waar hulle ’n man deursoek en op 125 Mandraxtablette, 66 sakkies tik, 80 sakkies dagga, 11 slimfone, 10 selfoonlaaiers, sewe simkaarte en een boutsnyer (bolt cutter) afgekom het. By die dwelms en gesteelde goedere is, van links, Deano Swarts (Community in Blue-lid), Rodia Wes (Groot Drakenstein-buurtwaglid), Louise Massia (Community in Blue-lid) en Shaun Jacobs (Groot Drakenstein-polisie).
