Met die winter wat amptelik hierdie maand tot ’n einde kom, het die Wes-Kaapse Bloeddiens ’n hernude oproep vir huidige en potensiële bloedskenkers gedoen om “ ’n magtige held te wees” en bloed te skenk.
Die diens sal vandeesmaand sy winterveldtog afsluit en die merkwaardige toewyding van bloedskenkers vier, wat ’n deurslaggewende rol gespeel het in die redding van lewens gedurende die kouer maande. Dit sal beklemtoon dat elke individu, ongeag hul skenkingmylpaal, ’n magtige held is wat help om die provinsie se bloedvoorraad die hele jaar deur te handhaaf.
Die tema vir Augustus is “Wees ’n magtige held. Skenk Bloed,” wat alle individue vra om die uitdaging aan te neem om moontlik drie lewens te red deur een bloedskenking. Dit sal ook die laaste kans wees vir skenkers om hul hande op ’n paar eksklusiewe heldesokkies te kry.
“Sonder die ondersteuning van ons skenkers sou dit nie moontlik wees om lewens te red nie. Ons is diep dankbaar aan elke skenker wat die winterkoue aangedurf het om bloed te skenk; hulle is die ware helde van die Wes-Kaap,” het Marike Carli, woordvoerder van by die Wes-Kaapse Bloeddiens, gesê:
Wanneer hulle skenk, begin skenkers met ’n vertroulike vraelys en verifieer hul besonderhede. ’n Vingerpriktoets toets jou hemoglobienvlak, wat verseker dat dit die vereiste 12,5 g/dl vir vroue en 13,5 g/dl vir mans bereik.
’n Professionele verpleegster voer dan ’n mediese ondersoek uit, wat die skenkers se bloeddruk en pols nagaan. Sodra die groen lig gegee word, sal skenkers voortgaan om ’n eenheid bloed te skenk, gevolg deur heerlike sap en beskuitjies om verlore vloeistowwe aan te vul.
Skenkers moet tussen 16 en 75 jaar oud wees, minstens 50 kg weeg, in goeie algemene gesondheid wees, en ’n veilige seksuele leefstyl handhaaf.
Op die dag van skenking word skenkers aangeraai om ’n maaltyd drie of vier uur voor die skenking te eet en goed gehidreer te bly voor, tydens en ná die skenking.
“Ons moedig die publiek aan om magtige helde te wees en hierdie winter bloed te skenk. Dit neem net 30 minute van jou tyd en jy help pasiënte in nood,” het Carli bygevoeg.
Vir verdere besonderhede of om jou naaste skenkingskliniek te vind, besoek www.wcbs.org.za, laai die bloeddiens se app af, of stuur ’n WhatsApp-boodskap na 060 549 7244.
