Marilé du Plessis, ’n sjef by Rust en Vrede Restaurant in Stellenbosch, is een van die 15 streeksfinaliste wat gekies is vir die S.Pellegrino Jong Sjef Akademie-kompetisie vir 2024-’25.
Die wêreldwye inisiatief het ten doel om die talentvolste jong sjefs onder 30 jaar oud te ontdek en mentor. Du Plessis is een van vier Suid-Afrikaners wat as finaliste vir Afrika, die Midde-Ooste en Suid-Asië gekies is, saam met Zanté Neethling van Beyond Restaurant in Constantia, Jason Jonker van Upper Union in Gardens, Monaheng Moloinyane van Badinage Restaurant in Pretoria en Luckson Mare van The Living Room by Summerhill Estate in Durban.
Duisende sjefs van oor die wêreld heen het vir die kompetisie aansoek gedoen, geïnspireer deur die geleentheid om direk van die mees invloedryke lede van die gastronomiewêreld te leer en hul unieke kreatiwiteit en visie te demonstreer. Onder hulle het 165 die eerste ronde geslaag en is nou gereed om hul talent en passie tydens die verskeie streekeindstryde te wys.
Elke jong sjef se aansoek en hul kenmerkende gereg is geëvalueer deur kulinêre kenners by die wêreld se voorste internasionale opvoedkundige en opleidingsentrum vir Italiaanse kookkuns, ALMA. ALMA se kiesproses het op drie sleutel kriteria berus: tegniese vaardighede, kreatiwiteit, en ’n persoonlike geloof in die transformerende krag van gastronomie om ’n positiewe verandering in die samelewing deur kos te maak.
“Die S.Pellegrino Young Chef Academy-kompetisie verras ons met elke uitgawe en dit is nie vanselfsprekend nie, aangesien ons sedert die eerste uitgawe met hulle saamwerk. Kandidate oortref hulself elke jaar, gelei deur hul passie en toewyding,” het Matteo Berti, ALMA se hoof van onderwys, gesê.
“Die kiesproses was nie maklik nie, maar nou is dit oor aan die kandidate op die kortlys om hul talente deur die loop van die kompetisie te wys. Sterkte aan almal van hulle!”
Hierdie groep talentvolle jong sjefs sal oor 15 verskillende streeks-eindstryde oor die wêreld heen van September tot Januarie 2025 meeding – ’n ongelooflike geleentheid vir blootstelling waar die sjefs hul kenmerkende geregte aan ’n plaaslike jurie sal voorlê.
Die bekende beoordelaars sluit in Bertus Basson (Suid-Afrika), Akmal Anuar (Verenigde Arabiese Emirate) en Roaya Saleh (Bahrein), wat die taak sal hê om die wenners in vier toekenningskategorieë by die Afrika, Midde-Ooste en Suid-Asië streeksgeleentheid in Kaapstad in November te kies.
Die toekenningskategorieë is: S.Pellegrino Jong Sjef-toekenning; S.Pellegrino Sosiale Verantwoordelikheid-toekenning; Acqua Panna Verbinding in Gastronomie-toekenning en Fine Dining Lovers Food for Thought-toekenning.
Die streekswenners in elk van hierdie toekenningskategorieë sal volgende jaar by die groot eindstryd om die wêreldtitel meeding.
Om die volledige wêreldwye lys van kandidate te sien en meer oor die inisiatief te lees, besoek www.sanpellegrinoyoungchefacademy.com.
