Stellenbosch se agri-werkers is die ruggraat van die plaaslike landbousektor en is Donderdag (25 Julie) vir hul merkwaardige bydraes vereer.
Die plaaslike ronde van die jaarlikse Wes-Kaap Prestige Agri-prysuitdeling is verlede week by die Doornbosch-sentrum gehou. Volgens die organiseerder Colette Davids van die Stellenbosse Landbougenootskap het vanjaar se inskrywings puik wenners opgelewer. “Daar was ’n paar uitblinkers wat vir die eerste keer deelgeneem het, maar daar was ook die bekendes wat ons jaar ná jaar sien. Aanhouers wen en dit is wonderlik om te sien hoe die bekende name oor die afgelope tydperk gegroei het,” meen sy.
Inskrywings vir die kompetisie het vanjaar tot 102 gegroei nadat 81 werkers verlede jaar deelgeneem het.
Darryl Jacobs, adjunk-direkteur-generaal: landbou-ontwikkeling en ondersteuningsdienste in die provinsie, was die gasspreker by die geleentheid en het die werkers vir hul bydrae tot die landbousektor bedank.
“Ons vier jul toewyding aan jul handewerk. Julle, as deel van die sektor, wys jaar op jaar sy veerkragtigheid en aanpasbaarheid in die moeilikste omstandighede. Jul passie vir die werk skyn ten spyte van oorstromings, moeilike ekonomiese omstandighede of siektes deur,” sê Jacobs.
Hy meen met kundigheid, passie en sin van gemeenskap wat in die plaaslike sektor heers, is die toekoms van landbou in die provinsie blink.
Die deelnemers het meegeding in die afdelings algemene werker, drywer, diereproduksie, besproeiingspesialis, tegniese operateur, maatskaplike ontwikkeling, administratiewe personeel, voorman, junior bestuur, middelbestuur en beste potensiaal, en die groot prys van die aand was die Stellenbosch- Prestige Landbouwerker van die Jaar 2024. Dié top-landbouwerker van die streek sal nou aanbeweeg na die volgende ronde van die kompetisie, waarna die provinsiale wenners uiteindelik gekroon sal word.
Jeanne-Marie Marais van die plaas Uitkyk Domain het met die gesogte titel weggestap.
“Dit was die eerste keer dat ek ingeskryf het nadat die Uitkyk-span my gemotiveer het. Hierdie prys is vir my ’n bewys dat ek op die regte plek op die regte tyd is. Dit bevestig dat die toekoms waaraan ek bou, die regte een is,” sê dié assistent- wingerdbestuurder oor haar toekenning. Marais was ook die afdelingswenner in middelbestuur.
Ander afdelingswenners het Joseph Samuels van Lourensford ingesluit, wat as die beste junior bestuurder gekroon is. Samuels het die prys aan sy pa, wat die naweek voor die geleentheid oorlede is, opgedra.
’n Emosionele Magriete Engelbrecht, algemene werker van die jaar, het die span van Uitkyk Domain bedank wat haar aangespoor het om in te skryf.
Hoewel Nicholas Tigere (Taaibosch) die tweede naaswenner in die tegniese operateur-afdeling was, is hy as die werker met die beste potensiaal om eendag met die Prestige-toekenning weg te stap, aangewys. Die beoordelaars was dit eens dat hulle ’n wonderlike toekoms vir Tigere in die sektor sien.
Die plaas wat die aand met die meeste pryse ontvang het, was Lourensford.
