Aanhangers van a capella en begeleide koorwerke kan uitsien na ’n uur lange uitvoering van musiek uit twee verskillende eras wanneer die ad hoc-koor Koorinsident uittreksels van Giovanni Pierluigi da Palestrina se Missa Papae Marcelli, asook werke deur Arvo Pärt, sing. Die gehoor sal ook getrakteer word op laasgenoemde se bekende “Berlynse Mis”, wat gepaard gaan met orrelbegeleiding deur Zorada Temmingh. Die program sluit laastens ook ’n interessante werk deur Vytautas Miškinis in. Koorinsident, bestaande uit verskeie lede en oudlede van kore in die Stellenbosch- en Kaapstad-omgewing, staan onder leiding van die komponis en dosent David Wolfswinkel. Die konsert vind môre (Vrydag 25 Augustus) om 19:30 en Sondag (27 Augustus) om 17:00 in die Stellenbosch Moederkerk plaas. Kaartjies is aanlyn by Quicket teen R140 vir volwassenes en R100 vir pensioenarisse, studente en kinders beskikbaar. Meer inligting oor Koorinsident kan by www.facebook.com/koorinsident gevind word, of stuur e-pos na koorinsident@gmail.com.
