Die Wes-Kaapse Bloeddiens (WKBD) het sy hoed afgehaal vir die merkwaardige pogings van die 103 hoërskole in die provinsie vir hul bydrae van 12 926 eenhede bloed gedurende 2023.
Die behoefte aan bloed en bloedprodukte bly jaarliks toeneem, dus is dit belangrik vir die WKBD om sy aktiewe skenkerbasis te vergroot. Jeug speel ’n noodsaaklike rol in die volhoubaarheid van die diens, dus het dit goeie bande gesmee met opvoedkundige instellings en bloedskenkklinieke op hierdie persele opgestel.
Die diens het ook ander skole aangemoedig en uitgenooi om deel te neem aan die bloedskenkklinieke. Hoërskoolleerders kan bloed vanaf die ouderdom van 16 begin skenk. Geen ouerlike toestemming word benodig nie, maar leerders moet die POPIA-vorm, ’n wettige toestemmingsdokument wat ouers moet onderteken om inligting te verwerk, voltooi.
Die WKBD het hoërskole in die Wes-Kaap aangespoor om hulle te kontak om óf ’n bloedskenkkliniek by hul skool te vestig óf uit te vind waar die naaste bloedskenkkliniek is.
Die diens het die toptien skole by naam genoem en bedank vir hul uitsonderlike pogings in die insameling van die meeste eenhede bloed in die provinsie vir 2023:
1. Hoërskool Outeniqua – 370 eenhede
2. Protea Heights-akademie – 318 eenhede
3. Worcester Gimnasium – 276 eenhede
4. Hoërskool Vishoek – 264 eenhede
5. Hoërskool Emil Weder – 249 eenhede
6. HTS Drostdy – 246 eenhede
7. The Settlers High School – 234 eenhede
8. Hoërskool Bergvliet – 233 eenhede
9. Langenhoven Gimnasium – 218 eenhede
10. Hoërskool George – 194 eenhede
“Dankie aan al ons superhelde op skool vir die ekstra myl wat julle geloop het en ons gehelp het om 12 926 merkwaardige eenhede bloed in te samel,” het Marike Carli, WKBD-woordvoerder, gesê.
Vir meer inligting of om jou naaste bloedskenkkliniek te vind, besoek www.wcbs.org.za, laai die WKBD-toepassing af, of stuur ’n WhatsApp-boodskap na 060 549 7244.
