Vyf multi-sport-atlete van Paul Roos Gimnasium het Suid-Afrika vanjaar in verskeie wêreldkampioenskappe verteenwoordig.
Thomas van der Merwe het aan die 2024- Moderne Vyfkamp-wêreldkampioenskap in Portugal deelgeneem en 22ste in die seuns-o.17-afdeling geëindig. In dié sportsoort neem atlete in ’n skerm- en swem-hindernisbaan en gekombineerde laserpistoolskiet-hardloop deel. Die perdespring-gedeelte is slegs ’n keuse vir meestersatlete.
Mattijs Machtelinckx (o.19) het vanjaar sy junior Protea-kleure verwerf en ’n bronsmedalje by die 2024-Triathle-wêreldkampioenskap en ’n sesde plek by die 2024-Biathle-wêreldkampioenskap in Egipte verower.
Alexander Southwood (o.17) het ook aan die 2024-Triathle-wêreldkampioenskap in Egipte deelgeneem en is in 17de plek oor die wenstreep.
Hunter Krynauw (o.15) verteenwoordig Suid-Afrika tans by die 2024-Vierkamp-wêreldkampioenskap in Guatemala. Hierdie sportsoort behels ’n swem-hindernisbaan en gekombineerde laserpistoolskiet-hardloop-komponent.
Coenie van Vuuren, die PRG-afrigter en meestersatleet (70 jaar-plus), het vanjaar ’n bronsmedalje by die Meesters- moderne vyfkamp-wêreldkampioenskap in Hongarye gewen. Hy was ook deel van die SA aflosspan wat ’n silwermedalje in die kompetisie gewen het.
Van Vuuren het in die 2024-Triathle-wêreldkampioenskap ook ’n silwermedalje verower. Hy was by die 2024-Biathle-wêreldkampioenskap in Egipte weer op die podium waar hy nog ’n silwermedalje gewen het.
