Paul Roos Gimnasium herdenk in November alle gevalle soldate, en meer spesifiek die 26 oudleerders van Paul Roos wat hul lewe vir hul land in die twee Wêreldoorloë, die Grensoorlog en die vryheidstryd afgelê het.
Die reünie-groepe van 1954, 1955 en 1956 het as eregaste die verrigtinge bygewoon.
Die verrigtinge het die lees van die ererol deur Frans van Niekerk behels waarna ’n krans by die gedenkmuur gelê en ’n laaste eerbetoon deur Devon Milne, hoofseun 2021, gedoen is. Die verrigtinge is met die speel van die “Laaste Taptoe” deur ’n graad 10-leerder, Zachary Sauls, afgesluit met ’n minuut van stilte. “Uit respek en waardering vir die groot offer wat hierdie helde gebring het, wil ek elke Paul Rooser uitdaag om alles in jou vermoë te doen om konflik te vermy en jou daarop toe te spits om verdraagsaamheid te bevorder. Beywer julle om vredemakers te wees en respek en medemenslikheid altyd voorop te stel,” het Van Niekerk gesê.
