Die rugbyspanne van Paul Roos Gimnasium (PRG) is hierdie Saterdag (20 April) die gasheer vir die spanne van die Hoër Jongenskool Paarl (Boishaai) in die Sportsmans Warehouse- Premier Interskole-kompetisie.
Die skole sal mekaar by die Markötter-sportterrein in Stellenbosch aandurf, met veral die derbykragmeting tussen die o.19A-spanne wat beloof om ’n aksiebelaaide stryd te wees.
Dié derby is deurtrek van 150 jaar se tradisie, met hierdie Wes-Kaapse rugbykragte wat terselfdertyd bure en mededingers is.
Hoewel hulle aanvanklik weens hul ligaverpligtings sporadies ontmoet het, het dié twee skole se gedeelde sportgeskiedenis bekendheid en mededingendheid oor hul lang tradisionele wedywering gekweek.
Dié skole het sedert 2000 reeds 22 keer op die veld ontmoet, met Boishaai wat 13 oorwinnings aangeteken het, PRG agt en een wedstryd wat gelykop gespeel is. Die Stellenbossers het in verlede jaar se wedstryd met 35-17 geseëvier.
PRG, wat deur beduidende beleggings in infrastruktuur en talent ondersteun word, is ’n krag om mee rekening te hou en pronk met ’n onoorwonne lopie in hul vier wedstryde vir die jaar. Die span se indrukwekkende oorwinnings by die Noord-teen-Suid-toernooi dui op hul gereedheid vir die komende kragmeting teen Boishaai, wat reeds sy slag gewys het met oorwinnings teen Garsfontein, Jeppe en Oakdale.
Boishaai het in sy laaste wedstryd teen ’n vasberade en geesdriftige Wynberg-span in die laaste minuut van die wedstryd vasgeval. Hy sal hoop om teen PRG terug te bons met ’n sege teen sy Eikestad-buurskool.
- Die o.19A-wedstryd word om 14:00 regstreeks op die SuperSport Schools-kanaal (DStv 216) uitgesaai.
