Die Wes-Kaapse premier, Alan Winde, het die afgelope Vrydag (30 Januarie) ‘n vergadering van die Wes-Kaapse regering se geïntegreerde energie- en water- raad gelei om die provinsie se reaksie op toenemende watertekorte verder te koördineer.
Winde het met provinsiale kabinetslede, burgemeesters, munisipale bestuurders en ander rolspelers ontmoet en hulle aangemoedig om die momentum te behou om die provinsie se energie- en waterstelsels meer veerkragtig te maak.
Watersekerheid was boaan die sakelys.
Die raad is ingelig dat die Wes-Kaapse kabinet op 22 Januarie ‘n amptelike versoek aan die nasionale rampbestuursentrum (NRMC) gerig het om ‘n provinsiale ramp te verklaar.
Dié versoek dien as ‘n voorkomende risiko-bestuursmaatreël om beter bestuur en koördinering te verseker.
Volgens die raad is dit waarskynlik dat die NRMC die versoek sal toestaan, wat die weg sal baan vir die vrystelling van noodgeld om die provinsiale regering se algehele ramphanteringsvermoë te versterk.
Die implementering van die Wes-Kaapse waterveerkragtigheidstrategie, wat in Oktober 2025 bekendgestel is, vorder ook goed.
Die provinsie doen ‘n beroep op inwoners, sakeondernemings en boere om hul waterbesparingspogings te verskerp.
“Ons moet water verantwoordelik gebruik; reg deur die jaar – nie net tydens krisisse nie,” het Winde gesê.
