“Die bewering dat inwoners slegs bedien sal word as hulle aanlyn afsprake het, is verregaande. Dit diskrimineer direk teen armer, meer kwesbare of ouer inwoners wat nie die internet gebruik nie en wat op instapdienste by binnelandse sake staatmaak. Dit is wreed en onmenslik om ’n gogo wat sedert 03:00 in die ry gestaan ??het op hierdie basis weg te wys.”
So sê dr. Leon Schreiber, DA-LP en verkiesingshoof in Stellenbosch, nadat inwoners glo Maandagoggend by binnelandse sake in Stellenbosch weggewys is omdat hulle nie vooraf ’n bespreking gemaak het nie.
Volgens Relston Lakay, ’n inwoner, het hulle tot hul verbasing Maandagoggend verneem dat slegs mense met afsprake gehelp sou word.
“Hier het mense omgedraai wat sedert 03:00 in die ry voor die hek staan. ’n Trokkie vol mense het omgedraai omdat hulle hulp geweier is. Dit is nie regverdig nie. Die mense is ingelig dat hulle nie gehelp sal word sonder ’n afspraak nie (wat hulle aanlyn moes gemaak het) en dat slegs 100 mense bygestaan ??sal word.”
Inwoners voel dit is onaanvaarbaar en onregverdig teenoor diegene wat nie toegang tot internet het om hierdie besprekings te maak nie.
Die inwoners kla ook dat hulle nie voldoende ingelig is oor die nuwe prosesse nie, en beweer hulle is erger af as ’n maand gelede toe die nuwe sekondêre tak geopen is.
Eikestadnuus verneem dat dieselfde voorwaardes, om eers ’n aanlyn bespreking te maak, vir die Absa-tak van binnelandse sake ook geld.
“Net ’n paar weke gelede het die minister en direkteur-generaal van binnelandse sake op ’n parlementêre vergadering beloof om dienslewering in Stellenbosch te verbeter en om die DA se petisie oor dié kwessie te bespreek. Terwyl die aankondiging van ’n sekondêre tak by die ABSA-gebou wat op daardie vergadering gemaak is, welkom was, is dit sinloos as die bykomende kapasiteit nie beskikbaar gestel word aan alle inwoners wat dit nodig het nie,” sê Schreiber.
Hy sê dit blyk nou dat binnelandse sake dalk reeds die beloftes verbreek het wat hy op die parlementêre vergadering gemaak het om die haglike toestand van dienslewering te verbeter.
“Ek sal aan beide die minister en die voorsitter van die parlementêre komitee skryf en eis dat die uitsluiting van inwoners sonder aanlyn besprekings beëindig word en om te verseker dat alle takke presteer. Al word binnelandse sake geheel en al deur die ANC-beheerde nasionale regering bestuur, sal die DA voortgaan om alles in ons vermoë te doen om hulle te druk om Stellenbosch-inwoners te dien met die respek wat hulle verdien.”
Eikestadnuus het via e-posse, WhatsApp en oproepe by Siya Qoza, woordvoerder van die minister van binnelandse sake, en David Hlabane, mediabestuurder van die departement van binnelandse sake, navraag gedoen, maar teen druktyd geen kommentaar ontvang nie.
Eikestadnuus het ook ’n maand gelede navraag gedoen by die departement van binnelandse sake oor die doel en rol en watter dienste die sekondêre tak by die Absa-gebou sal bied, maar ook geen antwoord op navrae ontvang nie, hoewel Hlabane en Qoza albei beloof het om kommentaar te lewer.
