Leerders aan Paul Roos Gimnasium het uitsonderlik goed in die nasionale matriekeksamen in 2021 presteer.
Volgens die skole-ondersteuningsentrum se ranglys beklee Paul Roos die 10de posisie onder die 20 top-skole met die meeste onderskeidings in die land; sesde posisie onder die 20 topskole met die meeste onderskeidings nasionaal vir Afrikaanse skole; vierde vir die meeste onderskeidings in fisiese wetenskap; tweede vir die meeste wiskunde-onderskeidings nasionaal; eerste vir die meeste onderskeidings in rekeningkunde en eerste vir die meeste onderskeidings in ingenieursgrafika en ontwerp nasionaal.
By die onlangse WKOD-prysuitdeling by Leeuwenhof ontvang Paul Roos Gimansium die volgende eerbewyse: WKOD-sertifikaat vir akademiese uitnemendheid. PRG is ook as een van die 20 top- akademiese skole in die Wes-Kaap aangewys.
PRG se Alexander van Wyk het ook die WKOD-merietelys gehaal deur een van die 20 toppresteerders in die Wes-Kaap te wees en twee ander kandidate, Ruan Buhr en Glasson Osborne, het eerbewyse ontvang vir uitnemende prestasies in wiskunde.
Van Wyk het met nege onderskeidings ’n gemiddelde van 95,67% behaal en gaan vanjaar data-wetenskap aan die Universiteit Stellenbosch studeer.
Buhr het ook met nege onderskeidings en ’n gemiddelde van 93,17% geslaag. Hy gaan ook data-wetenskap aan die US studeer.
