Vyf mans van Cloetesville, wat van die moord op ’n Uber-bestuurder van Stellenbosch aangekla word, is verlede Donderdag (26 Januarie) borgtog geweier. Die saak is tot Maandag 27 Februarie vir verdere ondersoek uitgestel.
Die broers Macelino en Ryan David en hul medebeskuldigdes, Gillmore Abrahams, Marvin Bickerstaff en Adrian Fray, staan tereg op aanklagte van moord, die roof van ’n motorvoertuig, kaping en roof met verswarende omstandighede nadat hulle glo die slagoffer, Vuyisa Mqosombo, Vrydag 13 Januarie vermoor en langs die Muldersvlei-/Elsenburgpad agtergelaat het (“Twee lyke binne dae in Eikestad gevind”, Eikestadnuus, 26 Januraie).
Die verdagtes het glo Mqosombo se dienste bespreek en hom later aangeval. Sy lyk is die volgende dag omstreeks 18:15 deur ’n pendelaar langs die Muldersvlei-/Elsenburgpad aangetref.
“Met die polisie se aankoms op die toneel is die oorledene met meswonde aan die bors en nek aangetref. Die oorledene se motor is die volgende dag (14 Januarie) in Cloetesville opgespoor, waarna vasgestel is die oorledene was ’n Uber-bestuurder,” sê kapt. Nathalie Martin, ’n plaaslike polisiewoordervoerder.
Die verdagtes is drie dae later in Cloetesville, waar die motor ook gevind is, in hegtenis geneem.
Nagenoeg 40 Uber- en Bolt-bestuurders en talle gemeenskapslede het verlede Donderdagoggend by die landdroshof in Stellenbosch betoog en hul stem teen die toekenning van borgtog dik gemaak.
“Ons is baie hartseer oor ons medekollega op so ’n vrede manier gesterf het. Hy wou net ’n lewe vir homself maak. Dit is nie regverdig dat hy so moes sterf en ons nou vir ons lewens moet vrees nie. Hierdie gedrag is onaanvaarbaar en ons soek geregtigheid vir Vuyisa,” het ’n verteenwoordiger van die Uber- en Bolt-bestuurders gesê.
Stephanie Heneke, ’n gemeenskapsleier en voorsitter van die gemeenskapsorganisasie Wings of Love & Hope, sê een Uber-bestuurder is een te veel en eis dat die gereg sy gang moet gaan om geregtigheid vir die slagoffer en sy familie te voorsien.
Die Stellenbosch-gemeenskapspolisiëringsforum se voorsitter, Magdalene Blankenberg, het gesê die gemeenskap moet nie anderkant toe kyk wanneer ongeregtigheid gebeur nie.
“Geregtigheid moet vir Vuyisa geskied. Ons sit met ’n probleem en ons moet daaroor praat. Ons kan net die probleem aanspreek as die gemeenskap en die polisie saamwerk. Ons kan nie toelaat dat mense wat dienste aan ons lewer vermoor word nie, hulle is ook deel van ons gemeenskap en moet ook beskerm word. Die skuldiges moet gestraf word.”
