William Sezoe, die ondervoorsitter van die Universiteit Stellenbosch se Studenteraad, gaan dié naweek saam met die US-rektor, prof Wim de Villiers, ten bate van die #Move4Food inisiatief aan die Cape Town Cycle Tour (CTCT) deelneem.
Die CTCT vind Sondag (12 Maart) in Kaapstad plaas en De Villiers en Sezoe gaan soos oudergewoonte deur ’n groep fietsryer van die universiteit vergesel word.
“’n Groep Maties span elke jaar kragte saam met die Rektor om fiets te ry vir die #Move4Food inisiatief, ’n veldtog wat poog om studentehonger te bekamp, ??wat ’n groeiende kommer oor die kampus heen is,” sê Sezoe.
Ten spyte daarvan dat hy nie ’n ervare fietsryer is nie, het Sezoe besluit om aan vanjaar se toer deel te neem om die #Move4Food-veldtog te ondersteun. “Die SR het ’n aansienlike toename in voedselonsekerheid op kampus gesien, en ek glo dit is noodsaaklik om die kwessie aan te spreek. Baie studente gaan slaap honger of stres oor waar hul volgende ete vandaan gaan kom. As ’n SR kan ons nie stilsit en hierdie probleem ignoreer nie,” het Sezoe gesê.
Hy voeg by: “As studente weet ons hoe belangrik dit is om toegang tot voedsame voedsel te hê om ons akademiese strewes te ondersteun. Ongelukkig sukkel baie studente oor die heen land met voedselonsekerheid, wat ’n beduidende impak op hul akademiese sukses kan hê. Deur die #Move4Food-veldtog te ondersteun, kan ons ’n positiewe impak maak en ons medestudente in nood help.”
Die SR doen ’n beroep op individue om ’n skenking te maak vir hierdie verdienstelike saak. “Jou bydrae, hoe klein ook al, kan ’n wesenlike verskil maak in die lewens van diegene wat met voedselonsekerheid sukkel. Kom ons kom saam as ’n gemeenskap om ons medestudente te ondersteun en te verseker dat niemand honger ly nie.”
Om ’n skenking te maak besoek https://www.givengain.com/…/william-sezoe-raising…/
