Die Universiteit Stellenbosch (US) se Studenteraad (SR) het vandag (Sondag 23 Oktober) ’n massavergadering op die Rooiplein gehou en alle koshuise uitgedaag om hul koshuiskulture krities te heroorweeg deur doelbewuste besinning en eerlike besprekings.
Dit volg ná nog ’n urineringsvoorval die afgelope naweek by die Eendrag-manskoshuis gebeur het. Die voorval het in die vroeë oggendure van Saterdag (22 Oktober) plaasgevind toe ’n erg besope student in die kamer van twee koshuismaats geürineer het.
Dit is die derde urineringsvoorval by die US vanjaar. Die eerste voorval het in Mei (“Studente eis skuldige moet geskors word: Rassespanning woed,” Eikestadnuus, 19 Mei) en die tweede een het in September (“Hoës bekyk nóg ’n urineervoorval,” Eikestadnuus, 29 September) plaasgevind.
Die US het sy diepe kommer oor alkoholmisbruik op en rondom die kampus herbeklemtoon nadat die universiteit se uitvoerende bestuur kennis geneem het van nog ’n urineringsvoorval en gesê dat menswaardigheid ononderhandelbaar vir die universiteit is en dat dit gerespekteer en gehandhaaf moet word.
Die saak is by die toepaslike universiteitstrukture aangemeld vir verwysing na die US se uitvoerende bestuur en sodat ’n onmiddellike ondersoek ingestel kan word.
Die geïmpliseerde student is Saterdag (22 Oktober) uit die koshuis geskors, hangende die uitkoms van ’n ondersoek. Die US se rektor en visekanselier, prof. Wim de Villiers, sal verdere stappe oorweeg en oor skorsing uit die universiteit besluit nadat hy al die feite in die saak bestudeer het.
Die US het in ’n verklaring gesê indien sodanige waardigheid aangetas is, moet dit op geregtelike wyse herstel word soos daarvoor voorsiening gemaak word in die universiteit se dissiplinêre raamwerk.
Die US is as goedbestuurde instelling daarvan oortuig dat geregtigheid en die wet sy loop moet neem en reëls moet te alle tye nagekom word om die belange en regte te beskerm van beide die studente wat geraak en geïmpliseer word. Dit maak verdedigbare en volhoubare uitkomste moontlik.
“Ons sal voortgaan om al die hulpbronne tot ons beskikking te gebruik om die plaag van onverantwoordelike alkoholverbruik deur sommige van ons studente te bekamp,” het prof Deresh Ramjugernath, viserektor vir leer en onderrig, gesê.
“Ondanks uitgebreide ingrypings en die jongste hersiene koshuisreëls wat alkoholgebruik in koshuise streng reguleer, is dit duidelik dat meer drastiese optrede en regulasies nodig is. Daar moet met die munisipaliteit en sakegemeenskap geskakel word oor hoe ons kan saamwerk om onverantwoordelike alkoholgebruik te beperk. Ons kan geen steen onaangeroer laat om hierdie verwoestende gedrag aan te spreek nie.”
Die saak sal deur die universiteit se kantoor vir studentedissipline ondersoek word in ooreenstemming met die nuutste weergawe van die dissiplinêre gedragskode vir studente.
“In ons verklaring wat op 23 September vrygestel is, was dit ons oproep tot aksie aan alle koshuisruimtes om hul onderbewuste vooroordele te bevraagteken en waarom gekleurde studente steeds die slagoffers van sulke voorvalle is. Die SR veroordeel in die openbaar individuele en sistematiese rassisme in al sy vorme, en ons erken die pyn wat dit vir ons studente veroorsaak,”het die SR gesê.
“Ons kan nie meer dronkenskap as ’n verskoning vir hierdie gedrag aanvaar nie. Dit is die derde keer dat ’n student van kleur aan ’n onmenslike daad van urinering onderwerp word. Hierdie voorval vertel net van die kulturele gebrek en toksiese nalatenskappe wat ongelukkig ’n kenmerk van die lewe vir gekleurde studente op die US bly. Dit is ’n kommerwekkende patroon wat geen plek het in die US waarin ons wil bestaan ??nie,” het die SR bygevoeg.
“Ons verwag dat die uitkoms van hierdie voorval niks minder sal wees as die presedent wat in die voorafgaande voorvalle geskep is nie. Ons hou die Sentrale Dissiplinêre Komitee (SKD) aan daardie standaard – dit is ons definisie van geen verdraagsaamheid. Die belange van die breër studentegemeenskap behoort van kardinale belang te wees. Die studente is moeg. Die studentegemeenskap kan nie anders as om dit as blatante dade van rassisme te beskou nie en dit is ’n bekommernis wat ons as die SR wil aanspreek.Ons sal seker maak dat niemand gemaklik genoeg is om rassisties of diskriminerend op ons kampus te wees nie.”
Ramjugernath sê dit is nou baie belangrik dat alle studente die geleentheid gegun word om vir die eksamens wat vandeesweek begin, voor te berei. Dit was ook die duidelike versoek van die twee studente wat geraak is dat hul identiteit sowel as dié van die geïmpliseerde student vertroulik bly.
Die US sê hy sal soos en wanneer nodig, dadelik verdere inligting verskaf oor die uitkoms van die ondersoeke en die prosesse wat aan die gang is.
