Vroue in landbou is tydens Vrouemaand deur die Wes-Kaapse ministerie van landbou vir hul bydrae tot die landbousektor gehuldig.
Hierdie departement het die jaarlikse Vroue-entrepreneurstoekennings Dinsdag 13 Augustus in die Stellenbosch-stadsaal aangebied. “Belê in vroue: versnel vordering en bereiking van geslagsgelykheid en die bemagtiging van vroue” was die tema vir die geleentheid.
Vroue van reg oor die provinsie is gevier vir hul prestasies deur die toekennings wat, volgens die departement, ’n hoeksteen-inisiatief is om vroue, jong vroue en vroue met gestremdhede vir hul kritieke bydrae tot voedselsekerheid en die ekonomie te erken.
Vanjaar is 38 uitstaande inskrywings ontvang, wat vroue se belangrike rol in die transformasie van die landbousektor demonstreer het.
Ná ’n streng beoordelingsproses is wenners in verskeie afdelings vir hul besonderse entrepreneursvaardighede en toewyding tot volhoubare ontwikkeling gekies.
Anchen de Peers van die plaas Baakensrug in Beaufort-Wes is aangewys as die beste werker.
Die beste kleinboerprodusent is van Hopefield waar Sharleen Bodenheim by Kauthar’s Broiler Chickens betrokke is.
Die beste bestaansvervaardiger is Lillian Masebenza van die Mhani Gingi Social Entrepreneurial Network.
Berene Damons van Tesselaarsdal Wines in Hermanus is aangewys as die beste kommersiële vervaardiger, terwyl Liebre Jacobs van FruitLips in die Bergrivier-gebied, met die toekenning as beste Agri-verwerker weggestap het.
Die provinsie se beste vroulike uitvoerder is Yolande Ann van Niekerk van Nitaflo in Grabouw.
Jo-André Gregoru van Our Poultry Place (Kraaifontein) en Sheena Paulus van Tri Toad in Philippi het die Spesiale Ministeriële toekenning verower. Die ministeriële toekenning het aan Natasha Williams van Natasha Signature Wines, in die Overberg, gegaan.
“Vroue is die ruggraat van ons landelike gemeenskappe. Deur in hul potensiaal te belê, bevorder ons nie net geslagsgelykheid nie, maar verseker ons ook die volhoubare groei van ons landbousektor,” het dr. Ivan Meyer, die provinsiale minister van landbou, ekonomiese ontwikkeling en toerisme, by die geleentheid gesê.
Die departement sê die 2024- Vroue-entrepreneurtoekennings bevestig die Wes-Kaap se verbintenis om geleenthede vir vroue in die landbou te skep, met erkenning van hul noodsaaklike rol in die dryf van ekonomiese transformasie en die bevordering van ’n meer inklusiewe samelewing.
