Die bekende Stellenbosch-wynoes-parade keer terug na die strate van Suid-Afrika se wynhoofstad!
Hierdie wyn-geïnspireerde gedoente is Saterdag 9 April terug ná ’n afwesigheid van twee jaar, met ’n behoorlike gegons, wat lank onthou sal word.
Die pandemie het dit net tydelik in sy spore gestuit, maar die geliefde optog is dié geleentheid waar boere, werkers en wynliefhebbers op kleurryke sierwaens deur die dorp paradeer en die dorp “rooi verf” om die einde van nóg ’n vrugbare wyndruif-seisoen te vier.
En die beste van alles: Jy is genooi! Bring jou familie en vriende en kom word deel van die menslike ketting deur die historiese strate. Die parade begin om 09:00 en vertrek van die bekende Speelgoedmuseum en vleg dan onder die eikebome deur, om 30 minute later by die Stellenbosch-stadsaal aan te kom. Daar sal die burgemeester die optog se beste sierwa beloon en ook ’n prys uitdeel aan die geleentheid se span met die beste gees.
Ná die kort dankseggingseremonie sal die parade voortgaan om die vreugde van vanjaar se oes te deel. Om die feestelikhede tot ’n hoogtepunt te bring, is daar ’n braaiery, musiek in lewende lywe en verversings vir die deelnemers asook spesiale vermaak vir die kinders.
Die Stellenbosch-oesparade word met die streek se wynkelders, wynroete-organisasie, Wesgro en die Stellenbosch-munisipaliteit se ondersteuning gehou. Geen bespreking is nodig nie.
